قائد سے لاتعلقی اختیار کرلی، اب اُس سوچ سے بھی کرلو، ناصر حسین شاہ کا ایم کیو ایم کو جواب
کراچی: سندھ کے وزیر اطلاعات ناصر حسین شاہ نے ایم کیو ایم پاکستان کی پریس کانفرنس پر ردعمل دیتے ہوئے مشورہ دیا کہ قائد سے لاتعلقی اختیار کرنے کے بعد اب اُس سوچ سے بھی علیحدگی اختیار کریں۔
صوبائی وزیر اطلاعات کا کہنا تھا کہ ’او بھائی جب آپ نے اپنے قائد سے ترک تعلق کر دیا ہے تو ان کی سوچ سے بھی علیحدگی اختیار کریں، تجاوزات اور غیر قانونی تعمیرات کروا کر روشنیوں کے شہر کا بیڑہ غرق کرنے والے تو آپ لوگ ہیں اور اب روز آکر مگر مچھ کے آنسوں بہاتے ہیں‘۔
اُن کا کہنا تھا کہ ’کراچی کے با شعور عوام اب آپ لوگوں کو پہچان چکے ہیں، اردو بولنے والوں کے نام پر اپنی جیبیں بھرنے والوں کو لوگ مسترد کر چکے ہیں، جس کا واضح ثبوت حلقہ 249 کے ضمنی انتخابات ہیں، جہاں ایم کیو ایم کا کا امیدوار چھٹے نمبر پر آیا‘۔
ایم کیو ایم کی غیر قانونی تجاوزات کے خاتمے کی حمایت، سپریم کورٹ سے کمیشن قائم کرنے کا مطالبہ
صوبائی وزیراطلاعات نے کہا کہ ’مردم شماری پر پیپلز پارٹی کا پہلے دن سے واضع موقف ہے، کہ سندھ کے ساتھ زیادتی ہوئی ہے، آپ نے تو محض دو وزارتوں کے مزے لینے کے لیے مردم شماری کے معاملے پر پی ٹی آئی سے سودا کر لیا، اگر کراچی کا اتنا درد ہے ، تو اس کا ثبوت دیں اور وفاقی وزارتوں سے استعفیٰ دیں، کراچی پر امن شہر بن گیا ہے، اس کا امن امان خراب کرنے کی کسی کو اجازت نہیں دیں گے، اب شہر میں تمام قومیتیں ایک دوسرے سے مل جل کر رہ رہی ہیں‘۔
