کراچی: وزیر اطلاعات سندھ شرجیل میمن کا کہنا ہےکہ بلاول بھٹو کے بیان پر بھارت میں مظاہرے کئے جارہے ہیں، قوم آج وزیر خارجہ کی حمایت میں باہر نکلے، ریلیاں نکالی جائیں گی، تمام سیاسی جماعتیں شرکت کریں۔
سندھ آرکائیوز میں پریس کانفرنس کرتے ہوئے انہوں نے کہا کہ وزیر خارجہ بلاول بھٹو زرداری نے عالمی فورمز پر موسمیاتی انصاف کے حوالے سے پاکستان کا مقدمہ موثر انداز میں رکھا، جس کو دنیا نے تسلیم کیا، اس دوران بھارت کے ایکسٹرنل افیئرز منسٹر نے فضول بیان دیا، جس کا انہوں نے بھرپور جواب دیا، مودی سرکار ہندووتوا ایجنڈے پر کام کررہی ہے، مسلمانوں کو نشانہ بنایا جارہا ہے۔
انہوں نے مزید کہاکہ فلسطین ہو یا کشمیر، جہاں انسانی حقوق کی خلاف ورزی ہوگی، ہم وہاں کھڑے ہوں گے، وزیر اطلاعات سندھ نے مزید کہا کہ پاکستان میں دہشتگردی واقعات کے تانے بانے بھارت سے ملتے ہیں، کلبھوشن پاکستان کیا کرنے آیا تھا؟ دہشتگرد ہندوستان کا وزیراعظم ہے۔
