ارشد شریف کیس: جے آئی ٹی آج دبئی جائے گی

اسلام آباد : صحافی ارشد شریف قتل کیس کے لیے تشکیل دی گئی سپیشل جے آئی ٹی آج شام دبئی روانہ ہو گی۔ذرائع کا کہنا ہے کہ سپیشل جے آئی ٹی دبئی میں ایک ہفتے کی انکوائری کے بعد کینیا بھی جائے گی۔

دبئی میں ٹیم ارشد شریف کے آخری دنوں کی ملاقاتوں اور رابطوں کی معلومات حاصل کرے گی ۔ جبکہ کینیا میں سپیشل جے آئی ٹی جائے وقوعہ کے ساتھ وقار اور اس کے بھائی سے بھی پوچھ گچھ کرے گی۔

ذرائع کا مزید کہنا ہے کہ وزارتِ داخلہ اور خزانہ نے اس سپیشل جے آئی ٹی کے اخراجات ادا کرنے سے معذرت کر لی تھی۔دونوں وزارتوں کی معذرت کے بعد جے آئی ٹی کے لیے سفری اخراجات اور ٹی اے ڈی اے کی مد میں ایک کروڑ روپے اسلام آباد پولیس نے ادا کیے ہیں۔

ذرائع کا یہ بھی کہنا ہے کہ 5 رکنی ٹیم کے علاوہ مقدمے کے تفتیشی انسپکٹر محمد شہباز بھی دبئی روانہ ہوں گے۔ دریں اثناء وفاقی پولیس کے ترجمان کا کہنا ہے کہ ارشد شریف قتل کی تحقیقات کے لئے تشکیل سپیشل جے آئی ٹی کی معاونت کے لئے کینیا نے باہمی قانونی مدد کیلئے حکومت پاکستان کی درخواست کا مثبت جواب دیا ہے ۔ وزارت خارجہ نے کینیا میں سپیشل جے آئی ٹی کی معاونت کے تمام انتظامات مکمل کر لئے ہیں ۔

اپنا تبصرہ بھیجیں: