اسلام آباد: پاکستان تحریک انصاف کے چیئرمین عمران خان نے کہاہے کہ صاف شفاف الیکشن نہ ہوئے تو ملک ہاتھ سے نکل جائے گا، محسن نقوی کو دھاندلی کے لئے پنجاب کا وزیراعلیٰ لگایاگیاہے ،میرے خلاف توشہ خانہ کا کیس سب سے بڑا مزاق تھا،نواز شریف اور آصف علی زرداری نے توشہ خانہ سے گاڑیاں چوری کیں۔
ویڈیو لنک خطاب میں عمران خان نے کہاکہ محسن نقوی کو وزیراعلیٰ بنائے جانے پر کل لاہور میں جبکہ بدھ کو پنڈی میں احتجاج کی کال دے دی اور عوام سے اپیل کی کہ وہ دھاندلی روکنے اور اپنا حق چھیننے کےلئے باہر نکلیں۔
عمران نے کہاکہ محسن نقوی ہمارے مخالف پولیس والوں اور بیورو کریٹ کو لگائے گا جو الیکشن میں دھاندلی کرے گا،ان کو وزیراعلیٰ بنانے کے پیچھے وہ لوگ ہیں جنہوں نے عمران خان کے اوپر کاٹا ڈالا ہوا ہے۔
عمران خان نے مزید کہاکہ جنرل باجوہ کے این آر او ٹو ملنے سے یہ سب بچ گئے، اس حکومت نے توشہ خانہ میں میری تمام تفصیل دی، اب عدالت نے ان سے توشہ خانہ کا ریکارڈ طلب کیا تو کہتے ہیں کہ سیکرٹ ہے۔ان کاکہناتھاکہ سیاستدانوں کے اوپر کاٹا لگانے کا نقصان پورے ملک کو ہوتا ہے، ہم نے پوری کوشش کی کہ انتشار نہ ہونے دیں،ان کو معلوم ہے کہ یہ الیکشن میں ہمیں ہرا نہیں سکتے، اس لیے الیکشن نہیں کراتے، ہمارے مخالف لوگوں کا اب ایک پوائنٹ ایجنڈا ہوگا پی ٹی آئی کو کیسے دبانا ہے، یہ تب الیکشن کرائیں جب انتظامیہ اور عملہ ان کا اپنا ہوگا۔
