کراچی: وزیراعلیٰ سندھ مراد علی شاہ نے کہا ہےکہ انتہاء پسندی، دہشت گردی اور غربت امن کیلئے خطرہ ہیں، یہ بات انہوں نے امن مشق 2023 کے غیر ملکی مندوبین سے ملاقات کے دوران کہی۔
اس موقع پر صوبائی وزراء شرجیل میمن، سعید غنی، ناصر شاہ، مشیر قانون مرتضیٰ وہاب، چیف سیکریٹری، آئی جی و دیگر موجود تھے۔
وزیراعلیٰ نے کہا کہ پاکستان امن پر یقین رکھتا، اسلام ہمیں سکھاتا ہےکہ انسانوں کیلئے پُرامن ماحول قائم کریں، انتہاء پسندی کا مقابلہ کرکے امن قائم کیا جاسکتا، اس دور میں امن کو لاحق خطرات کی نوعیت تبدیل ہوگئی، جس کے باعث کسی ایک قوم کیلئے ان خطرات کا مقابلہ کرنا ممکن نہیں رہا۔
انہوں نے کہا کہ امن مشق اہم اقدام ہے، جس کا مقصد سمندری میدان میں خطرات سے نمٹنے کیلئے دنیا کی تمام بحری افواج کے تعاون کو بڑھانا ہے۔
