اسلام آباد : وزیراعظم شہبازشریف ترکیہ کے 2 روزہ دورے پر انقرہ پہنچ گئے۔وزیراعظم زلزلہ متاثرہ علاقوں کے دورے کے ساتھ ترک صدر طیب اردوان سے ملاقات بھی کرینگے۔ ہوائی اڈے پر اعلیٰ ترک حکام اور ترکیہ میں پاکستان کے سفیر ڈاکٹر یوسف جنید نے وزیرِ اعظم کا استقبال کیا،وفاقی وزیرِ اطلاعات و نشریات مریم اورنگزیب، معاونِ خصوصی طارق فاطمی اور چیئرمین این ڈی ایم اے لیفٹیننٹ جنرل انعام حیدر ملک وزیرِ اعظم کے ہمراہ ہیں۔
قبل ازیں وزیراعظم نے اپنے ایک ٹویٹ میں کہا ہے کہ پاکستانی حکومت اورعوام کی طرف سے اپنے ترک بھائیوں اوربہنوں کویکجہتی اور اخوت کا پیغام دینے کے لئے ترکیہ جا رہا ہوں۔
انہوں نے کہا پاکستان اور ترکیہ کے عوام اگرچہ دو الگ ریاستوں کے شہری لیکن ایک قوم کی طرح یکجان و یک قالب ہیں اور ہم ان کے نقصان کو اپنانقصان سمجھتے ہیں۔وزیراعظم نے کہا ترکیہ اور شام میں زلزلے سے ہونے والی تباہی سے کوئی حکومت تنہا نہیں نمٹ سکتی۔انہوں نے کہا کہ وقت آ گیا ہے کہ دنیا انسانیت کی مشکلات اور تکالیف کے حل کے لئے تعاون بڑھائے۔