کراچی : وزیر اعلیٰ سندھ سید مراد علی شاہ نے قومی کرکٹر سرفراز احمد کی باؤلنگ پرشارٹ کھیل کر سندھ پریمیئر لیگ (SPL)کا باقاعدہ آغاز کردیا ہے اور کہاہے کہ نئی کرکٹ لیگ کا مقصد سندھ کے نوجوانوں کو بااختیار بنانا ہے۔
یہ بات انھوں نے وزیراعلیٰ ہاؤس میں منعقد پریمیئر لیگ کے افتتاحی تقریب سے بطور مہمان خصوصی خطاب کرتے ہوئے کہی۔ تقریب رونمائی میں صوبائی وزیر ٹرانسپورٹ و ماس ٹرانزٹ اینڈ محکمہ اطلاعات شرجیل انعام میمن، وزیراعلیٰ سندھ کے خصوصی مشیر برائے قانون اور حکومت سندھ کے ترجمان بیرسٹر مرتضیٰ وہاب، پاکستان کرکٹ ٹیم کے سابق کپتان اور عالمی شہرت یافتہ آل راؤنڈر شاہد آفریدی ،سابق قومی کرکٹرز ، SPL کے برانڈ ایمبیسیڈر اور دیگر شخصیات نے شرکت کی۔
ایس پی ایل سندھ میں نوجوان کرکٹرز کے اپنی صلاحیتوں کو منوانے کیلئے ایک پلیٹ فارم فراہم کررہا ہے جس کا مقصد صوبے سے عالمی معیار کے کرکٹرز تیار کرنا ہے۔ لیگ چھ ٹیموں پر مشتمل ہوگی جس میں بے نظیر آباد لالز، حیدرآباد بہادرز، کراچی غازیز، لاڑکانہ چیلنجرز، میرپورخاص ٹائیگرز اور سکھر پیٹریاٹس شامل ہیں۔ تقریب کے دوران ایس پی ایل کے صدر عارف ملک نے اس بات پر روشنی ڈالی کہ ایس پی ایل کے پاس پلیئر ڈویلپمنٹ پروگرام ہے جو بالخصوص اندرون سندھ کے کھلاڑیوں کو تیار کرنے پر مرکوز ہے۔
انہوں نے یہ بھی بتایا کہ سندھ پریمیئر لیگ کی نشریات 52 ممالک میں نشر کی جائے گی اور مستقبل میں 10000 ملازمتیں پیدا ہوں گی۔ افتتاحی تقریب میں اپنے خطاب میں مہمان خصوصی وزیر اعلیٰ سندھ سید مراد علی شاہ نے صوبے کے نوجوانوں اور معاشی ترقی کیلئے ایس پی ایل کی اہمیت پر روشنی ڈالی۔ انہوں نے کہا سندھ پریمیئر لیگ صرف کھیلوں کیلئے نہیں ہے بلکہ ہمارے نوجوانوں کی صلاحیتوں کو فروغ دینے، انہیں بہترین کارکردگی کے مواقع فراہم کرنے اور سندھ کی بہترین اشیاء کی نمائش کے بارے میں بھی ہے۔ یہ ہمارے صوبے میں معاشی ترقی، روزگار کے مواقع پیدا کرنے اور سیاحت کے فروغ کا ایک پلیٹ فارم بھی ہے۔ وزیر ٹرانسپورٹ اینڈ ماس ٹرانزٹ اینڈ محکمہ اطلاعات شرجیل انعام میمن نے اپنے مکمل تعاون کا اظہار کیا اور یقین دلایا کہ سندھ حکومت سندھ کے غیر استعمال شدہ ٹیلنٹ کو فروغ دینے کیلئے لیگ کو مکمل تعاون کریں گے ۔
ترجمان سندھ حکومت اور وزیر اعلیٰ کے مشیر برائے محکمہ قانون و پراسیکیوشن بیرسٹر مرتضیٰ وہاب صدیقی نے حکومت سندھ کے اس عزم کا اعادہ کیا کہ اس طرح کے کھیلوں کے مقابلوں کے ذریعے سندھ کے نوجوانوں کی ترقی پر SPLجیسے مثبت اقدامات کی حوصلہ افزائی کی جائے گی جو کہ لاکھوں افراد کو اپنی طرف متوجہ کرنے کیلئے عالمی سطح پر مقبولیت حاصل کریں گے۔
ایس پی ایل کے برانڈ ایمبیسیڈر شاہد آفریدی نے لیگ اور اس کے مشن کیلئے اپنی مکمل حمایت کا اظہار کیااور کہا کہ مجھے سندھ پریمیئر لیگ کا برانڈ ایمبیسیڈر ہونے کا اعزاز حاصل ہے جو میرے دل کے بہت قریب ہے۔ انھوں نے مزید کہ اکہ مجھے یقین ہے کہ ایس پی ایل میں سندھ سے عالمی معیار کے کرکٹرز پیدا کرنے کی صلاحیت ہے ۔ سندھ پریمیئر لیگ یو کے اینڈ یورپ کے سفیر فیصل سلیم خان نے ایس پی ایل کے پلیئر ڈویلپمنٹ پروگرام کا روڈ میپ پیش کیا جو اندرون سندھ سے کرکٹرز کو انگلینڈ میں انٹرنیشنل کرکٹ اکیڈمیز تک لے جائے گا۔ انہوں نے بتایا کہ ہم نے پہلے ہی یورپ اور انگلینڈ کی بڑی کرکٹ اکیڈمیوں کے ساتھ ایم او یوز پر دستخط کیے ہیں۔
فیصل سلیم خان نے مہمان خصوصی وزیر اعلیٰ سندھ سید مراد علی شاہ کو سرکاری ایس پی ایل جرسی بھی پیش کی اور تقریب میں شرکت کرنے پر ان کا خصوصی شکریہ ادا کیا۔
ایس پی ایل کے چیئرمین ملک اسلم نے اس شاندار تقریب رونمائی میں شرکت کرنے پر مہمان خصوصی اور معزز مہمانوں کا شکریہ ادا کیا۔ انہوں نے وزیر اعلیٰ سندھ کے معاون خصوصی برائے کھیل ارباب لطف اللہ کی جلد صحتیابی کیلئے بھی نیک خواہشات کا اظہار کیا جو کورونا کی وجہ سے تقریب میں شریک نہیں ہو سکے تھے اور انکی نمائندگی سیکرٹری کھیل اور امور نوجوانان نے کی۔
لیگ کو حکومت سندھ اور تاجر برادری کی حمایت حاصل ہے جو لیگ کو صوبے میں اقتصادی سرگرمیوں اور سیاحت کو فروغ دینے کے حامی ہیں۔ سندھ پریمیئر لیگ پاکستان کی کرکٹ میں ایک بہترین اضافہ ہونے کا ثبوت ہے اور حکومت سندھ، تاجر برادری اور ملک بھر کے کرکٹ شائقین کے تعاون سے ایک بڑا عالمی ایونٹ بننے جارہا ہے
۔