کراچی: قائد اعظم ٹرافی فرسٹ کلاس کرکٹ ٹورنامنٹ کے چوتھے راؤنڈ کے آخری دن راولپنڈی نے فیصل آباد کو 7 وکٹوں اور پشاور نے لاہور بلیوز کو 3 وکٹوں سے ہرا دیا۔ سرفراز احمد نے ناقابل شکست ڈبل سنچری اسکور کی تاہم کراچی وائٹس اور لاہور وائٹس کے میچ کا بھی نتیجہ برآمد نہ ہوسکا۔ ملتان اور فاٹا کا میچ بھی ڈرا ہوگیا۔
قذافی اسٹیڈیم لاہور میں کراچی وائٹس نے اپنی پہلی اننگزمیں 5 وکٹوں پر784 رنز کا بڑا مجموعہ تشکیل دیا۔ کپتان سرفراز احمد کی لاہور وائٹس کے خلاف شاندار ناقابل شکست ڈبل سنچری تھی۔
کپتان سرفراز احمد نے شاندار بیٹنگ کرتے ہوئے 236 گیندوں پر 200 رنز بنائے اور آؤٹ نہیں ہوئے، ان کی اننگز میں 24 چوکے اور ایک چھکا شامل تھا۔
یہ سرفراز احمد کی اس قائداعظم ٹرافی میں دوسری سنچری ہے علاوہ ازیں وہ دو نصف سنچریاں بھی بناچکے ہیں۔ دوسرے ناٹ آؤٹ بلے باز رمیز عزیز نے پندرہ چوکوں اور دو چھکوں کی مدد سے 151 رنز اسکور کیے۔
سرفراز احمد اور رمیز عزیز نے چھٹی وکٹ کی ناقابل شکست شراکت میں 351 رنز کا اضافہ کیا۔ لاہور وائٹس نے اپنی پہلی اننگز میں 9 وکٹوں کے نقصان پر 509 رنز اسکور کیے تھے۔ ایبٹ آباد میں پشاور ریجن نے لاہور بلیوز کو 3 وکٹوں سے ہرا دیا۔ پشاور کو جیتنے کے لیے 190 رنز بنانے تھے۔ کامران غلام نے 50 رنز اسکور کیے۔ شعیب اختر اسٹیڈیم راولپنڈی میں فاٹا اور ملتان کا میچ ڈرا ہوگیا۔ پنڈی اسٹیڈیم میں راولپنڈی نے فیصل آباد کو 7 وکٹوں سے ہرادیا۔ راولپنڈی کو جیتنے کے لیے 203رنز کا ہدف ملا تھا، عبدالفصیح نے 17 چوکوں کی مدد سے109 رنز ناٹ آؤٹ بنائے۔
دوسری جانب قائداعظم ٹرافی میں ایک اننگز میں پانچ سنچریاں سکور کرنے کا ریکارڈ بن گیا۔ کراچی وائٹس کے ایک یا دو نہیں بلکہ5کھلاڑیوں نے سنچریاں بنادیں جن میں سابق وکٹ کیپر کپتان بھی شامل ہیں۔ قذافی اسٹیڈیم لاہور میں لاہور وائٹس کے پہلی اننگز میں 509 رنز کے جواب میں کراچی وائٹس کے بلے بازوں نے جم کر بیٹنگ کرتے ہوئے قائداعظم ٹرافی کا ریکارڈ بنادیا۔
کراچی وائٹس کی جانب سے ایک ہی اننگز میں خرم منظور، عماد عالم، اسد شفیق، رمیز عزیز اورسابق کپتان قومی ٹیم نے سنچریاں داغ دیں۔ فرسٹ کلاس کرکٹ بشمول ٹیسٹ میچز کی تاریخ میں پانچویں بار ایک اننگز میں 5 سنچریاں بنیں ہیں۔
