ممبئی: بالی ووڈ کے سپر سٹار شاہ رخ خان ایک لڑکی کی جانب سے دائر کیے گئے دھوکہ دہی کے کیس میں پھنس گئے۔
بھارتی میڈیا رپورٹس کے مطابق ریاست مدھیہ پردیش کی ایک ضلعی عدالت نے بائجوز اور اس کا اشتہار کرنے والے بالی ووڈ سٹار شاہ رخ خان کو دھوکہ دہی کے کیس کا نوٹس جاری کردیا۔
میڈیا رپورٹس کے مطابق ہوا کچھ یوں کہ پرینکا ڈکشت نامی ایک لڑکی نے سال 2021 میں عدالت میں ایک درخواست دائر کی تھی کہ میں نے آئی اے ایس کی تیاری کیلئے بائجوز کوچنگ میں داخلہ لیا جس کیلئے 1 لاکھ 8 ہزار بھارتی روپے ایڈوانس فیس ادا کی لیکن مجھے پڑھایا گیا اور نہ ہی رقم واپس کی گئی۔
متاثرہ لڑکی نے اپنی درخواست میں کہا تھا کہ میں نے بائجوز کے اشتہار میں شاہ رخ خان کو دیکھ کر فیس بھری تھی لیکن مجھے دھوکہ دیا گیا،کیس کی سماعت کے دوران عدالت نے بائجوز اور اداکار کو نوٹس جاری کرتے ہوئے متاثرہ لڑکی کو فوری طور پر رقم واپس کرنے کا حکم دے دیا۔
عدالت نے کہا کہ پرینکا دکشت کو رقم 12 فیصد سالانہ سود کے ساتھ واپس کی جائے، 5 ہزار بھارتی روپے قانونی چاہ جوئی اور 50 ہزار بھارتی روپے ذہنی اذیت پہنچانے کے جرم میں ادا کیے جائیں۔
