کراچی: مردم شماری کی تاریخ میں توسیع کے بعد رفتہ رفتہ کراچی کی آبادی میں اضافہ ریکارڈ ہورہا ہے اور کراچی کی آبادی 1 کروڑ 79 لاکھ 65 ہزار سے زائد شمار کی جاچکی ہے۔
ڈائریکٹر ادارہ شماریات سندھ منور علی گھانگرو کا کہنا ہے کہ ڈیجٹیل مردم شماری کے منگل کو جاری ہونے والے اعداد و شمار کے مطابق اندرون سندھ کی آبادی کراچی کی آبادی سے دگنی سے بھی زیادہ ہوگئی ہے۔اعداد و شمار کے مطابق سندھ کی مجموعی آبادی ساڑھے 5 کروڑ سے زائد ہوگی، کراچی کے علاوہ باقی ماندہ سندھ کی آبادی 3 کروڑ 71 لاکھ سے زائد ہوئی ہے۔
حیدرآباد ڈویژن میں 1 کروڑ 19لاکھ 78 ہزار 208 افراد کی گنتی ہوئی ہے۔اعداد وشمار کے مطابق لاڑکانہ ڈویژن کی آبادی 80 لاکھ، سکھر ڈویژن کی 62 لاکھ، بینظیر آباد (نوابشاہ ) ڈویژن کی 60 لاکھ جبکہ میرپور خاص ڈویژن کی آبادی 49 لاکھ ہے۔
