بلاول اور آصف زرداری گڈ کاپ، بیڈ کاپ کھیل رہے ہیں، جی ڈی اے

صدر سندھ یونائیٹڈ پارٹی و رہنما جی ڈی اے سید ذین شاہ نے کہا ہے کہ بلاول زرداری اور آصف زرداری گڈ کاپ اور بیڈ کاپ کا  کھیل رہے ہیں، بلاول نام نہاد جمہوری بن رہا ہے، جبکہ آصف زرداری پرو اسٹیبلشمنٹ بن رہا ہے۔

ان خیالات کا اظہار انہوں نے کراچی میں سندھ یونائیٹڈ پارٹی کی سینٹرل باڈی کے اجلاس سے خطاب کرتے ہوئے کیا، سید ذین شاہ نے کہا کہ نگراں حکومت کے وزیر اعلٰی ہاؤس سے لے کر کیئر ٹیکر وزراء کے دفاتر میں پیپلز پارٹی کی باقیات کام کر رہی ہیں جس کی وجہ سے پیپلز پارٹی کی پالیسیاں جاری ہیں۔

انہوں نے کہا کہ ہم مطالبہ کرتے ہیں کہ ان کو فوری طور پر ہٹایا جائے، انہوں نے کہا کہ سندھ کے صوبائی الیکشن کمشنر پیپلز پارٹی کے سہولت کار ہیں ان کی موجودگی میں سندھ میں شفاف انتخابات ناممکن ہیں۔

سید ذین شاہ نے کہا کہ ملک میں بدترین مہنگائی نے لوگوں کا جینا محال کر دیا ہے، نگراں حکومت ماضی کے حکمرانوں کی پالیسیوں پر عمل کر کے مہنگائی میں اضافہ کر رہی ہے۔

انہوں نے کہا کہ پیپلز پارٹی کے 15 سالہ اقتدار میں جو اربوں کھربوں رویوں کی کرپشن کی گئی ہے، ہر ادارے کو جس بھونڈے طریقے سے تباہ کیا گیا،  ورلڈ بینک اور ایشین بینک کے اربوں ڈالروں کو جس طرح سے اپنے اکاؤنٹس میں منتقل کیا گیا،  اس معاشی قتل عام  کا کڑا احتساب کرکے سندھ کے سیاہ ترین اور بدترین دور کے ان ظالم لٹیروں کو سخت سزائیں دی جائیں۔

انہوں نے کہا کہ ہم مطالبہ کرتے ہیں کہ سندھ کے مظلوم اور محکوم  عوام کی لوٹی ہوئی دولت واپس لائی جائے۔ اجلاس میں روشن علی برڑو، جگدیش آوجا، امیر علی تھیبو، خواجہ نوید، سید منیر حیدر شاہ، انعام کالانی ودیگر نے  شرکت کی۔