حکومت سندھ نے اسمگلروں، ذخیرہ اندوزوں اور ناجائز منافع خوروں کے خلاف گرد گھیرا تنگ کرنے کا فیصلہ کرلیا۔
ذرائع کے مطابق وفاقی وزارت داخلہ کی ہدایت پر صوبائی حکومت کی جانب سے تمام اضلاع کے ڈپٹی کمشنرز کو چینی، کھاد اور آئل کی اسمگلنگ اور ذخیرہ اندوزی پر قابو پانے کے لیے ہنگامی مراسلہ ارسال کیا گیا ہے۔
مراسلے میں کہا گیا ہے کہ سندھ بھر میں ضروری اجناس کی نقل و حمل، دستیابی اور قیمتوں پر کڑی نگاہ رکھی جائے، اور ڈپٹی کمشنر پرائس کنٹرول حکام کے ساتھ مل کر چھاپہ مار کارروائی کریں۔
ڈپٹی کمشنرز کو ناجائز منافع خوروں، ذخیراندوزوں اور اسمگلروں کے خلاف ایکشن کی ہفتہ وار رپورٹ مرتب کرنے کی بھی ہدایت کی گئی ہے۔
مراسلے میں کہا گیا ہے کہ وفاقی وزارت داخلہ کے تیار اور فراہم کردہ پروفارما کے مطابق مرتب کرکے پہلی رپورٹ پیر 18 ستمبر کو جمع کرائی جائے۔
