ڈپٹی میئر کراچی سلمان عبداللہ مراد نے کہا ہے کہ ملیر میں نالوں پر بنی دکانیں جلد از جلد مسمار کر دی جائیں، سپریم کورٹ کی ہدایات کے مطابق نالوں پر بنی دکانوں کے خلاف کارروائی عمل میں لائی جائے۔
یہ ہدایات انہوں نے اپنے دفتر میں محکمہ اسٹیٹ سے اجلاس کی صدارت کرتے ہوئے کہی۔ اس موقع پر سینئر ڈائریکٹر اسٹیٹ، ڈائریکٹر ٹرمینل اور دیگر افسران بھی موجود تھے۔
اجلاس کے دوران ڈائریکٹر اسٹیٹ نے بریفنگ دیتے ہوئے بتایا کہ کراچی کے مختلف علاقوں میں کے ایم سی کی مارکیٹوں کے دکانداروں کو ادائیگی کے لیے چالان جاری کیے جا رہے ہیں جبکہ نالوں پر بنی دکانوں کو سپریم کورٹ کی ہدایات کے مطابق مسمار کرنے کے لیے کارروائی بھی جلد ہی شروع ہوگی۔
انہوں نے بتایا کہ کے ایم سی کی مارکیٹوں میں قائم تجاوزات کو بھی ختم کیا جا رہا ہے تاکہ وہاں کاروبار کرنے والے دکانداروں کو سہولت فراہم کی جا سکے اس کے علاوہ پانی و بجلی کی فراہمی اور صفائی ستھرائی کے لیے انتظامات بھی کیے جا رہے ہیں۔
ڈپٹی میئر کراچی سلمان عبداللہ مراد نے کہا کہ یہ تمام کام بروقت مکمل کر لیے جائیں ، ہماری اوّلین ترجیح کے ایم سی کی مارکیٹوں کو بہتر بنانا اور تجاوزات کا خاتمہ کرنا ہے جس کے لیے اقدامات شروع کردیے گئے ہیں۔
