ماسکو: روسی صدر ولادیمیرپوٹن نے جوہری طاقت سے چلنے والے کروز میزائل بیوروزنک کے ’حتمی کامیاب تجربے‘ کا دعویٰ کیا ہے۔نیٹو اتحاد نے اس میزائل کو سکائی فال کا نام دیا ہے جو جوہری ری ایکٹر سے چلایا جاتا ہے۔ ٹھوس ایندھن کے راکٹ بوسٹر اسے ہوا میں چھوڑ کر فعال کرتے ہیں۔
روسی صدر ولادیمیرپوٹن کے ترجمان نے اخبار نیو یارک ٹائمز کی اس رپورٹ کو مسترد کیا تھا جس میں کہا گیا تھا کہ بیوروزنک نامی ہتھیار کی آزمائش ہونے جا رہی ہے۔
اس کے بعد روسی صدر ولادیمیرپوٹن نے یہ بیان دیا۔اس تجرباتی ہتھیار کا سب سے پہلے 2018 میں اعلان کیا گیا تھا۔ اسے یہ کہہ کر سراہا گیا تھا کہ اس کی ممکنہ طور پر لامحدود رینج ہے۔خیال ہے کہ یہ جوہری ری ایکٹر سے چلتا ہے اور جوہری جنگی ہتھیار لے جانے کی صلاحیت رکھتا ہے۔لیکن سرکاری طور پر اس کی صلاحیتوں کے بارے میں بہت کم معلومات دستیاب ہے۔ ایسی اطلاعات ہیں کہ پچھلے ٹیسٹ ناکام ہوئے تھے۔
صدرپوٹن کے بیان کی آزادانہ تصدیق نہیں ہوسکی جبکہ روسی وزارت دفاع کی جانب سے ابھی تک کوئی بیان سامنے نہیں آیا۔تاہم گذشتہ ماہ گردش کرنے والی سیٹلائٹ تصاویر سے پتا چلتا ہے کہ روس نے حال ہی میں آرکٹک جزیرے کے ایک دور دراز مقام پر نئی تنصیبات تعمیر کی ہیں جہاں سوویت دور میں ایٹمی تجربات کیے جاتے تھے۔
پوٹن نے سوچی کے بحیرہ اسود کے ریزورٹ میں ایک اجلاس سے خطاب کرتے ہوئے کہا کہ ’ہم نے جدید قسم کے سٹریٹجک ہتھیاروں پر کام مکمل کر لیا ہے جس کے بارے میں، میں نے بات کی تھی اور جس کا چند سال پہلے اعلان کیا تھا۔نیو یارک ٹائمز نے اسلحہ کنٹرول مہم کے گروپ نیوکلیئر تھریٹ انیشی ایٹو کا حوالہ دیتے ہوئے کہا کہ 2017 اور 2019 کے درمیان سسٹم کے پچھلے 13 ٹیسٹ ناکام رہے تھے۔روسی صدر نے اپنے سامعین کو یہ بھی بتایا کہ سرمت نامی بین البراعظمی بیلسٹک میزائل پر کام تقریباً مکمل ہو چکا ہے۔اس واضح انکشاف کے باوجودپوٹن نے کہا ہے کہ روس کا اپنے جوہری نظریے کو تبدیل کرنے کا کوئی منصوبہ نہیں ہے۔ یہ وہ پالیسی ہے جو ان حالات کا تعین کرتی ہے جن میں اس کی افواج جوہری ہتھیار استعمال کر سکتی ہیں۔انھوں نے مزید کہا کہ روسی ریاست کا وجود خطرے میں نہیں ہے اور ’صحیح دماغ اور واضح حافظے والا کوئی بھی شخص‘ اس کے خلاف جوہری حملے پر غور نہیں کرے گا۔
