کراچی : ایم ڈی سائٹ لمیٹڈ غضنفر علی قادری نے صوبائی وزیر صنعت و تجارت جام اکرام اللہ دھاریجو کی ہدایت پر سائٹ ایریا میں ہیٹ اسٹروک کیمپ قائم کردیا۔
ایم ڈی سائٹ لمیٹڈ غضنفر علی قادری نے کیمپ کے افتتاح کے موقع پر کہاکہ محکمہ موسمیات اور ڈیزاسٹر مینجمنٹ اتھارٹی کی جانب سے ہیٹ ویو کا خدشہ ظاہر کیاگیاہے جس کے پیش نظر حکومت سندھ اور وزیر صنعت و تجارت جام اکرام اللہ دھاریجو کی ہدایت پرکراچی سمیت تمام انڈسٹریل زونز میں ہیٹ اسٹروک کیمپ لگائے جا رہے ہیں۔
انہوں نے بتایا کہ یہ کیمپس ہیٹ اسٹروک الرٹ تک جاری رہیں گے۔انہوں نے کہاکہ سائٹ صنعتی ایریا میں ہزاروں مزدور روزانہ کی بنیاد پر سفر کرتے اور یہاں مختلف فیکٹریوں میں ملازمت کرتے ہیں اس لئے سائٹ لمیٹڈ کے مرکزی دفتر کے باہر کیمپ میں ٹھنڈے پانی کے ساتھ شربت کا بھی انتظام کیا جائے اور ہیٹ ویو سے بچاؤ کےلئے مختلف احتیاطی تدابیر بھی اخیتار کی جائیں۔
ایم ڈی سائٹ لمیٹڈ غضنفر علی قادری سائٹ کے مرکزی دفتر کے باہر افضا فلائی اوور کے نیچے قائم کیے گئے کیمپ کا دورہ بھی کیااور وہاں کیے گئے انتظامات کا جائزہ لیا، کیمپ پر مسافروں، مزدوروں اور عام عوام کے لیے ٹھنڈے پانی کا انتظام کیا گیا ہے۔انہوں نے حیدرآباد سمیت اندرون سندھ کے تمام انڈسٹریل اسٹیٹس میں بھی ہیٹ اسٹروک کیمپ لگانے کی ہدایت کر دی۔
اس موقع پر جیکب آباد کے بزنس مین حنیف بلیدی اور سائٹ لمیٹڈ کے افسران بھی ان کے ہمراہ تھے۔
