کراچی: شہر قائد میں شدید گرمی کی لہر جاری ہے اور اس وقت درجہ حرارت 41 ڈگری سینٹی گریڈ تک پہنچ چکا جبکہ موسم پر نظر رکھنے والوں نے شہر میں ہیٹ ویو کا خدشہ ظاہر کردیا ہے۔
تفصیلات کے مطابق شہر میں آج شدید گرمی کی لہر جاری ہے اور محکمہ موسمیات نے درجہ حرارت 43 ڈگری تک پہنچنے کا امکان ظاہر کرتے ہوئے کہا ہےکہ آج کراچی میں ہیٹ ویو کی لہر کا گرم ترین دن ہوسکتا ہے۔
کراچی میں گزشتہ ہفتے سے شدید گرمی کی لہر جاری ہے جس کےباعث محکمہ موسمیات نے ہیٹ ویو بھی جاری کررکھی ہے جب کہ شہر میں آج بھی ہیٹ ویو کی لہر برقرار ہے اور موسم شدید گرم ہے۔
محکمہ موسمیات کے مطابق کراچی میں اس وقت سمندری ہوائیں بند ہوچکی ہیں اور بلوچستان سے خشک ہوائیں چل رہی ہیں جن میں نمی کا تناسب کم ہے۔
محکمہ موسمیات کا کہنا ہےکہ کراچی میں دن میں نمی کا تناسب 40 سے 50 فیصد رہے گا اور شام کے وقت نمی کا تناسب 15 سے 25 فیصد تک رہنے کا امکان ہے، امکان ظاہر کیا جارہا ہے کہ آج شہر کا درجہ حرارت 43 ڈگری تک جاسکتا ہے اور موجودہ ہیٹ ویو کی لہر کا آج گرم ترین دن ہوسکتا ہے جب کہ کراچی میں گرمی کی شدت مزید 5 روز تک برقرار رہے گی۔
محکمہ موسمیات نے شہریوں اور بالخصوص موٹرسائیکل سواروں کو احتیاط کا مشورہ دیا ہے۔ حکام کا کہنا ہے کہ شہری غیر ضروری طور پر گھروں سےباہر نہ نکلیں اور باہر نکلنے کی صورت میں گیلا کپڑا سرپر رکھیں تاکہ دھوپ کی شدت سےمحفوظ رہا جاسکے۔
خبر کو عام عوام تک پہنچانے میں ہمارا ساتھ دیں، صارفین کے کمنٹس سے ادارے کا کوئی تعلق نہیں ہے۔
