کراچی: وزیراعظم عمران خان نے شہر قائد میں بچوں کی بڑھتی ہوئی وارداتوں اور اسٹریٹ کرائم میں اضافے پر تشیویش کا اظہار کرتے ہوئے آئی جی کو اقدامات کرنے کی ہدایت کردی۔
وزیراعظم عمران خان کی زیرصدارت امن وامان سے متعلق اجلاس ہوا جس میں وزیر اعلیٰ سندھ، گورنر سندھ، ڈی جی رینجرز، کورکمانڈر کراچی، آئی جی سندھ پولیس، وزیر داخلہ کے حکام سمیت دیگر اداروں کے نمائندوں نے شرکت کی۔
وزیر اعظم کو دی جانے والی بریفنگ میں بتایا گیا کہ کراچی آپریشن سےبڑےجرائم میں90فیصدکمی آئی جس پر عمران خان نے کراچی میں امن و امان کی مجموعی صورتحال پر اطمینان کا اظہار کیا۔
عمران خان کا کہنا تھا کہ قیام امن حکومت کی اولین ترجیح ہے کیونکہ اس کے بغیر معاشی ترقی ممکن نہیں ہے، امن و امان کی بحالی کے لیے سندھ حکومت کی ہر سطح پر مدد کریں گے، وفاق اور صوبائی سطح پرایجنسیوں میں ہم آہنگی ہونی چاہئے۔
عمران خان نے شہر میں بڑھتی ہوئی اسٹریٹ کرائم اور بچوں کے اغوا کی وارداتوں پر تشویش کا اظہار کیا اور آئی جی سندھ سے رپورٹ طلب کی، وزیر اعظم نے پولیس اور دیگر اداروں کو شہریوں کے جان و مالی کے تحفظ کو یقینی بنانے کے لیے اقدامات کرنے کی ہدایت بھی کی۔
