اسلام آباد: پاکستان کے 80 کی دہائی میں مقبول ہونے والے ڈرامے رواں برس جون سے سعودی عرب میں عربی زبان میں نشر کیے جائیں گے، یاد رہے کہ جب یہ دونوں ڈرامے پی ٹی وی پر نشر ہوتے تھے تو سڑکوں پر سناٹا چھا جاتا تھا۔
عرب نیوز کو انٹرویو دیتے ہوئے پاکستان ٹیلی ویژن (پی ٹی وی) کے عالمی تعلقات کی ڈائریکٹر شازیہ سکندر کا کہنا تھا کہ پاکستان کے دو مقبول ڈرامہ سیریلز’ دھوپ کنارے‘ اور ’تنہائیاں‘ کا انتخاب کیا گیا ہے، جو رواں برس جون سے سعودی عرب میں نشر کیے جائیں گے۔
ڈرامہ سیریل ’تنہائیاں‘ 1985 اور ’دھوپ کنارے‘ 1987 کے وہ مقبول ڈرامے ہیں جس کے مداح آج بھی دیوانے ہیں اور دونوں ہی حسینہ معین کے تحریر کردہ ہیں۔ ’دھوپ کنارے‘ میں ساحرہ کاظمی نے خوبصورت انداز میں ہدایت کاری کے فرائض انجام دیے جب کہ ‘تنہائیاں‘ کی ہدایت کاری شہزاد خلیل نے انجام دی تھی۔
ڈرامہ سیریل’دھوپ کنارے‘ میں مرکزی کردار اداکارہ مرینا خان اور اداکار راحت کاظمی نے ادا کیا تھا، اس جوڑی کو ناظرین نے خوب پسند کیا تھا اسی طرح ’تنہائیاں‘ میں مرینا خان اور آصف رضا میر نے مرکزی کردار نبھایا تھا۔
پی ٹی وی کی ڈائریکٹر شازیہ سکندر کا سعودی عرب میں ان ڈراموں کے نشر کرنے سے متعلق کہنا تھا کہ یہ قدم صرف معیشت کے لیے نہیں بلکہ اس سے سعودی عرب کے لوگ ہمارے مقامی ٹی وی سیریلز اور ثقافت کو پہچان سکیں گے، اسی کے ذریعے فنکاروں پاکستان کی ثقافت سمجھنے میں مدد مل سکے گی۔
یاد رہے کہ وفاقی وزیر اطلاعات فواد چوہدری نے متحدہ عرب امارات کے دورے کے موقع پر اعلان کیا تھا کہ جلد ہی پاکستانی ڈرامے اور فلمیں سعودی عرب میں نشر کیے جائیں گی۔
واضح رہے کہ گزشتہ برس ستمبر میں سعودی وزیر اطلاعات ڈاکٹر عواد بن صالح نے پاکستان کا دورہ کیا تھا جس میں ثقافت اور میڈیا کے ذریعے دونوں ممالک کے درمیان تعلقات مضبوط کرنے پر گفتگو کی گئی تھی۔
