کراچی: پیپلز پارٹی نے سانحہ کارساز کی برسی ملک بھر میں عقیدت و احترام سے منانے اور ملک بھر میں تعزیتی اجتماعات منعقد کرنے کا اعلان کیا ہے۔
سانحہ کارساز کے شہداء کو خراج عقیدت پیش کرنے کے لیے مرکزی تقریب آج بدھ کو کراچی میں ہوگی، جس سے پارٹی چیئرمین بلاول بھٹو زرداری خطاب کریں گے۔ ملک بھر میں ہونے والے تعزیتی اجتماعات میں پی پی پی چیئرمین کا خطاب ویڈیو لنک کے ذریعے براہِ راست نشر کیا جائے گا۔
پیپلزپارٹی سندھ کے جنرل سیکریٹری سینیٹر وقار مہدی اور پی پی پی کراچی ڈویژن کے صدر و سابق صوبائی وزیر سعید غنی نے پریس کانفرنس سے خطاب کرتے ہوئے کہاہے کہ سانحہ کارساز تاریخ میں پرامن سیاسی کارکنوں پر ہونے والے بدترین دہشتگرد حملوں میں سے ایک ہے۔
انہوں نے سانحہ کارساز کی 16 ویں برسی کے موقعے پر شہرِ قائد میں مرکزی تعزیتی اجتماع کے انعقاد اور اس دن کے حوالے سے دیگر سرگرمیوں کے بارے میں بتایا کہ منگل کی شام پارٹی عہدیداران و کارکنان یادگارِ کارساز کے مقام پر شمعیں روشن کر کے اور پھول رکھ کر شہداء کو خراج عقیدت پیش کریں گے۔
سابق صدر مملکت اور صدر پاکستان پیپلزپارٹی پارلیمنٹیرینز آصف علی زرداری نے یوم شہدا سانحہ کارساز کے موقع پر کارساز کے شہیدوں کو خراج عقیدت پیش کرتے ہوئے کہا ہے کہ 18اکتوبر کے شہداءکی قربانی، بہادری اور وفاداری کی تاریخ ہے،شہداءکی قربانی رائیگاں نہیں ہوگی۔ آصف علی زرداری نے کہا کہ اٹھارویں آئینی ترامیم جمہوریت کے شہداءکی جدوجہد کا ثمر ہے۔ انہوں نے کہ پاکستان کو مکمل فلاحی ریاست بنانے تک جمہوریت کے شہداءکے خون کے مقروض رہیں گے۔
